Archief
Gekke Maondaag
Lang hebbe weej Plagge en Plagginne d’r nao toe gelaef, ôzze Gekke Maondaag op 6 fibberwarie j.l.. Dit jaor enne extreem kalde Gekke Maondaag dus allemaol diek aangekleijd en de lange ônderbôks aan.
07.00 oor: Langzaam beginne de meiste wakker te waere, kiéke ôf de Plaggevlaag nag good hingt aan de boétegevel vân ut hoés en dân flot nao de keuke, wao en gebakke ei met spek klaor steit um âs gôjje basis te deene vur deze zoë belangriéke daag.
Um ôngeviër 07.45 oor laupe de leeje vân de Raod vân Elf, ôs Champieters, Kloëte Kookers en ôs Dansmarietjes nao de residensie vân de Plaggenhouwers “De Vonkel”. Naodât ut iërste gleske Jägermeister is gedrônke, kump de autostoet in bewaeging.
Um 08.10 oor steit de stoet stil beej ut hoés vân ôzze Prins. De Prins en zien Adjudante neme plaats achter op d’n iéswage vân Clevers. Orzjineel aangepas aan de temperatuur, um good te kunne zwaaje nao alle Plagge en Plagginne. Daonao wördt ut Broédspaar thoés opgehaald.
Naodât de meiste Grubbevorstenaere wakker zien getoetert, geijt de stoet nao ut Pestoër Vullinghsplein, wao de Schutteriej al steit te wachte. Zeej äöpene de Gekke Maondaag met de tradiesjonele scheut.
As ok de letste langslaopers wakker zien gemâkt, kân ut fiës beginne. Vânaaf Bekker Engels geijt de stoet richting ut vroegere gemeintehoés, vur de offiesjele handelinge.
Nao de sleuteleuverdrach door ôzze Burgemeister Kees van Rooij aan Prins Jos I is ut Boérebroedspaar Marieke en Jeron in de ônech verbônde op de gebroékelikke klugtige meniër door de ambtenare vân de Burgerlikke stand.
Now, nao vuül lache is ut dân eindelik de beurt vur de offiesjele handelinge deze morge. De Golde Plaggenhouwer is dit jaor oétgereikt aan Tom Hesen, vur 11 jaor lid vân de Raod vân Elf, waovân de letste jaore âs Vors. Vân herte proficiat Tom, dich hes um verdind.
Roel Asters haet vur de Hermeniej de hoésorde in ôntvangs genaome, vur ut orgenizeere vân en geweldige Boérebroelof. Proficiat.
Rônd 13.00 oor beginne vuül Plagge en Plagginne zich klaor te make vur d’n optog. Ut waar enne fantastiese optog. Good werk, alle deilnemers bedankt en en groët kompliment. Zoë, now kôs ut fiës pas ech good losbarste. Now dât hebbe ze geweite, alle kefeejs zoote good vôl en ut waar erg gezellig.
De echte Gekke Maondaagsvierders hebbe geluk en hôvve ni lang te wachte op de volgende Gekke Maondaag. Noteer mâr ves: Gekke Maondaag 2013; 28 jannewarie.
