Letste niejs
Ut is gedaon...
Beste Plagge en Plagginne, ut is gedaon. Ut seizoen 2011-2012 “Klug en Kleur” is vurbeej. En geweldig seizoen wât begôs op zaoterdig 24 september 2011 met de liedjes aovend. Met âs winnaar de Toddezèk met “De Miémelaer”. Oéteindelik hebbe ze op ut LVK de 2e plaats bereikt. Idderein keek alwir oét nao de nieje Prins. Wae zuuj ut waere?
Op 7 jannewarie 2012 kwaam Jos Mulders âs Prins Jos I op de buún teveurschién met zien Adjudante Peter Relouw en André Janssen.
Op zôndig 8 jannewarie 2012 kwaam Kevin Engels oét âs Jeugdprins Kevin I. De orgenizasie haet op en geweldige meniër invulling gegaeve aan ut oétkômme vân de Jeugdprins. Vân alle schoële, en dus de kienger, woorte Prins Bas (Smeets) en Prinses Anouk (Wolters) oétgekaoze um de kienger in dit seizoen veur te gaon.
Op zaoterdig 14 jannewarie kwaam op en prachtig Verlovingsbal ut Broédspaar vân 2012 oét. Marieke van Dijk en Jeron Verweij, vân hermeniej St. Joseph.
Now môs allein nag de Aldereprins bekend waere en dân kôs idderein zien auge richte op Gekke Maondaag. Dus woort op zôndig 15 jannewarie 2012 Hay Wijnhoven geprizzenteerd âs Aldereprins Hay V, met zien Adjudante Wiel Gerits en Jan Jeucken.
Zoë, now waar ut ganse vastenaovendgezelschap kompleet en kôs ut fiës ech losbarste. En ut woort en fiës!!! Dât heb ge vurrige waek al kunne laeze in ut mededelingeblaad. En dân de aafgelaupe Vastenaovend met ok dit jaor wir âs sloétstuk de Aldereprins-resepsie vân Aldereprins Hay V. Dees drukbezôchte resepsie waar ok dit jaor wir biëstig gezellig.
Netuurlik is ôzze Gekke Maondaag ut hoëgtepunt vân de Grubbevorster Vastenaovend.
Now idderein de Plaggevlaag wir haet binnegehaald, de pakke zien opgeruumd, is dit ut juuste moment um en bedankje euver te brenge aan alle Plagge en Plagginne die op welke meniër dân ok hebbe beejgedrage um dit seizoen wir zoë good te laote verlaupe.
Jaorvergadering
Op vriédig 23 maart a.s. zal de jaorvergadering vân Gekke Maondaagsvereinging "De Plaggenhouwers" waere gehalde. Weej verzeuke alle leeje um deze datum te noteere. Vur de nieje leeje, die ôs vereinging riéker is gewaore is ut aan te bevaele dezen datum vreej te halde.
Op dees vergadering zal ut nieje motto vur ut seizoen 2012/2013 gekaoze waere. Alle leeje meuge en idee inbrenge, dink mâr is ves nao. Ok zal d'r dit jaor wir via ôs websait en motto ingesteurd kunne waere, mâr oéteindelik bepaole de leeje demokraties wât ut nieje motto zal waere.
Verdere info kump nag.
Alle fotoos vân dit sezoen op en DVD...
Vân alle aktivteite zien door ôs fotograve fotoos gemâkt. Geej kunt dees fotoos bestelle vur 11,=.
